АМАЛ МЕН НИЕТ

Wed, 31 Jan 2007 09:01:58 GMT

АМАЛ МЕН НИЕТ

Пенденің ниеті аса маңызды. Ол сол ниетіне қарай діттеген мақсатына жетеді. Яғни бір адам ақиқатты аттап Құдайдан қашық өмір кешкісі келеді. Өмір бақи Аллаһ Тағаладан қашқандықтан ниетіне сай оның баратын жері де - Аллаһтан кашық Жәһәннамның оты. Енді біреу амалы мен құлшылығы шала болса да қашан да ниетін түзу ұстап, Хақ Тағаланың рахымынан шексіз үміт етпек. Аллаһ Тағала да оның ниетіне қарай Жәннатына алады.

Ардақты пайғамбарымыз Мұхаммедтың (с.а.с.) хадисіне үңілсек, Маһшар күні бір мұсылман таразыға тартылады. Бірақ күнәлары сауаптарынан басым келіп, періштелер оны жәһәннамға қарай сүйрей бастайды. Сонда әкетіліп бара жатып әлгі бейбақ қайта-қайта артына жалтақтап қарай береді. Осы кезде Аллаһ Тағала періштелеріне әлгі адамның неге артына қарай беретінін сұратқызады. Әлгі пенде сонда: "Мен тірі кезімде ылғи да Раббым Аллаһ Тағаланың рахымынан үміт күтетінмін. Күнәләрымның көп екенін білсем де, ешқашан да Раббымның рахымынан үміт үзбеген едім. Рахымы шексіз Аллаһ Тағала мені Жәһаннамға тастай қоймас.

Өйткені, Раббым аса Рахымды әрі менің күнәләрымды кешірсе Оның рахымынан ешнәрсе кемімейді ғой" деп іштей ойланып жүріп сауап амалдарды көп жасауға талпынатынмын. Раббым Аллаһ Тағала менің осы таза ниетім үшін мені кешіріп Маһшар күні мені рахым етер деген үмітпен ғұмыр кештім. Қашан да Оның шексіз рахымынан үміт үзбедім. Енді міне қайта-қайта артыма жалтақтай қарайлап, түкке де түсінбей келемін. Менің күнәләрым мен сауаптарым таразыға тартылып, күнәләрым ауыр басып кетті де, міне енді менің жәһәннамға түсуім үкім етілді.

Мен бұлай боларын әу бастан біліп сезінген едім, себебі күнә істерді сауап істерге карағанда көп істегенмін. Бірақ әрқашан Раббым Аллаһ Тағаланың мүмін құлдарына деген рахымы шексіз ғой. Аса рахымды Раббымның маған рахым етпеуі мүмкін емес қой деген үмітпен артыма қайта-қайта жалтақтай қарап келе жатқанымның мәнісі осы", — деп жылап жібереді. Сол кезде Рахымды Аллаһ Тағала: 'Мен құлымның ойлағанына қарай үкім беремін. Оны Жәннатқа апарыңдар!", - дейді.

Иә, мұсылманның ниеті аса маңызды. Ардақты пайғамбарымыз /с.а.с./: “Мұсылманның ниеті – амалынан қайырлы” — деген. Тағы бір хадисте: "Адамдар дүние жағынан төрт топқа бөлінеді. Бір пенде бар. Аллаһ Тағала оған мал-мүлік пен ілім берген. Ол дүние-мүлкін текке шашудан Аллаһтан қорқып, оны шариғат заңымен жұмсайды. Жақындарына қол-ұшын беріп, Аллаһтың алдында өз борышын дұрыс ақтайды.

Міне, осылай ол ең үлкен мәртебеге жетеді. Ал енді бір пенде бар. Аллаһ Тағала оған ілім берген. Бірақ дүние бермеген. Алайда бұл адамның ниеті адал. Ол "Егер дүнием болғанда пәленшедей қайыр жолға жұмсайтын едім" дейді. Аллаһ Тағала оның осы адал ниетін қабыл етіп, сауап жағынан алғашқы дәулетті адаммен теңестіреді.

Үшінші бір пенде бар. Оған Аллаһ дүние берген. Бірақ ілім бермеген. Бұл адам бар малын өзінің нәсіпқұмарлық жолына жұмсайды. Аллаһтан қорқуды яки жақындарына қарайласуды білмейді. Мал-мүлкінен зекетте бермейді. Бұл — ең жаманы. Төртінші бір адам бар. Аллаһ Тағала оған мал да ілім де бермеген. Бірақ ол дүниесін оңды-солды шашып, ысырап еткен жаман адамдарға қызығып: "Па, шіркін! Егер менің де сондай дүнием болғанда, пәленшедей оңды-солды шашып, дәл солай өмір сүретін едім" дейді. Бұл да күнәкар адамдай, күнә жағынан онымен теңеседі делінген. Ендеше, адамның ниеті аса маңызды.

Сондықтан ол амалына қарай емес, ниетіне қарай сауап алады. Ниеті бұзық кісінің жасаған құлшылығы да, амалы да қабыл болмайды. Бірде Ухуд соғысына Мәдинадағы барлық сахабалар аттанып кеткенде, Кузман деген бір адам соғысқа бармай қалады. Оны көрген Мәдинаның әйелдері "Соғыс қашқыны" деп келеке етеді. Ол бұл келеке сөздерге шыдай алмай намысқа тырысып, қалың қолдың артынан қуып жетіп, алдыңғы сапқа шығады. Дұшпанға садақ атып, ақырында қылышын суырып алып, ақырып жаудың ортасын ойып қаһармандық көрсетеді.

Алыстан мұны бақылап тұрған Аллаһ Елшісі сахабаларына /с.а.с./: 0л - Тозақтық", - дейді. Кузман соғыста жан сала айқасып, ақырында ауыр соққы алып, жараланып жерге құлайды. Сол кезде бір сахаба Аллаһ Елшісіне келіп: Уа, Расулуллаһ! Жаңа сіздің Тозақтық деген адамыңыз хас батырдай айқасып өлді", — дейді. Пайғамбарымыз /с.а.с/ тағы да: Ол Жәһаннамға кетті", — дейді. Мына жауапқа қатты таңырқаған кейбір мұсылмандар әуелгіде түк түсіне алмады.

Олар осылай екіұдай пікірде түрғанда бір сахаба келіп: "Уа, Расулуллаһ! Әлгі адам әлі өлмепті. Бірақ ауыр жаралы", — дейді. Осы кезде Кузманның қасынан өтіп бара жатқан Қатада деген сахаба оған жақындап: "Шахиттігің мүбәрәк болсын!", — деп құттықтау айтады. Кузман ақырғы рет басын көтеріп: Ант етейін! Мен дін үшін соғыспадым. Бар-жоғы өз қауымымның абыройы үшін ғана айқастым", — деп жауап береді де, өзіне қол жұмсап өліп кетеді.

Бұл жағдай шұғыл Пайғамбарымызға (с.а.с.) жеткізіледі. Аллаһ Елшісі /с.а.с./: "Аллаһу Акбар! Мен -Аллаһтың құлы һәм Елшісі екендігіме куәлік етемін", — дейді. Сосын хазіреті Біләлға /р.а./ қарап: "Жәннатқа мұсылмандар ғана кіреді. Исламға көмектескен адамның амалы оның иманды екендігінің дәлелі емес. Раббымыз Аллаһ Субханака уа Тағала қаласа Ислам дінін пасық кәпір адаммен де қуаттандыра алады", — дейді де осы сөздерді халыққа жеткізуге бұйрық береді.

Түзу ниет пендені Аллаһтың рахымы арқылы жәннәтқа бастаса, бұзық ниет иесін жәһәннамның құрдымына құлатады. Бүкіл әлемдердің Раббысы Аса Рахымды, Ерекше Мейірімді Аллаһ Субханака уа Тағала барша мұсылманның ниетін түзу етіп, екі дүниеде бақытты ғұмыр нәсіп етсін! Пейіліміз қашан да пейішке жетелесін! Қайта тірілетін Маһшар алаңында жүзімізді жарқын, иманымызды кәміл етсін! Әмии!

«Алдаспан» танымдық журнал, №7-8. 2006 жыл.

Авторы: М. ИСАҰЛЫ
2006-10-30

بِسْــــــــــــــــــــــمِ اﷲِارَّحْمَنِ ارَّحِيم: Құлшылық (Qulshiliq)

АМАЛ МЕН НИЕТ